Internet informazioa partekatzeko tresna bikaina da eta munduko adin guztietako pertsonen arteko komunikaziorako eta harremanetarako funtsezko baliabidea bilakatu da. Sarbide erraza eta bizkorra duten hamaika webgune, sare sozial, aplikazio, plataforma eta zerbitzuek gure online eta offline bizitza eraldatu dute.

Erabiltzen ditugun gailuak eta maneiatzen ditugun datu guztiak behar bezala ez babesteak ondorio larriak izan ditzake gure segurtasunean eta pribatutasunean, baita ingurukoenean ere, zibersegurtasuna mehatxatzen dutenek helburu edo motibazio ezberdinak dituztela kontuan hartuta.

Ingurune digitalean aritzean, ezinbestekoa da datuen babesarekin, pribatutasunarekin eta segurtasun informatikoarekin lotutako arriskuak eta mehatxuak identifikatzea, ondorioak aztertzea, babes- eta segurtasun-neurriei garrantzia emanda eta teknologiaren erabilera arduratsuan heztea, jokabide jakin batzuetatik eratorritako arriskuen jakitun izan daitezen eta haien eta besteen segurtasuna arriskuan jar ez dezaten.

“Ezetz Asmatu!” proiektu ludiko-hezitzailea da, 8 eta 14 urte bitarteko adingabeei zuzendutakoa, quiz azkar motako jokoak oinarri hartzen dituena. Online teknologiekin lotutako zibersegurtasuna eta pribatutasuna sustatzea du helburu nagusia.

IKTeskolak PantallasAmigas ekimenaren laguntzaz sortutako eta garatutako proiektua da, eta Bizkaiko Foru Aldundiak eta Eusko Jaurlaritzako Hezkuntza Sailak diruz lagundutako materiala da.